صوتها فيه
طيبة وقوة أهل النوبة، موهبتها مميزة وهى فنانة مجتهدة جدًا أثبتت نفسها على الساحة
الفنية من كام سنة فاتوا سواء كمغنية صولو أو مع فرق مهمة، بتحضر مزيكا جديدة
ومختلفة هتخلى لها بصمة مميزة فى المجال الفنى، هى فيوجن جميل بين الموسيقى الشرقى
والجاز مع لمسات من الطابع النوبى، قصة النجاح النهارده هنعرف تفاصيلها مع الفنانة
نسمة هركى (نطقها "إركى" يعنى الأرض أو القرية باللغة النوبية).
نسمة بتغنى
منذ نعومة أظافرها -زى ما بيقولوا- وهى فى المدرسة، واستمر الموضوع لحد ما اتخرجت
من كلية فنون جميلة ودرست تصوير زيتى، واشتركت فى فرقة أتيليه المسرح فى الكلية،
وفرقة "الطمى واحد والشجر ألوان" وهى فرقة غنائية مسرحية، قعدت فترة
شغالة فى مجالات بعيدة عن الغناء، كانت منسق برامج فى المورد الثقافى، ومدير برامج
فى إيقاع ومنسق فى Youth
Development Company، بس ركزت من فترة طويلة فى كاريير المزيكا.
نسمة مجتهدة
وشاطرة، بتذاكر وتقرأ وتشوف فيديوهات كتير سواء غناء شرقى أو غربى، وبتاخد كورسات
علشان تصقل موهبتها، منها ورشتين مع الفنان فتحى سلامة عن Music Knowledge وغناء، وورشة مع الشيخ زين
محمود درست تراث شعبى ومواويل، وورشة أوبرا مع د. نيفين علوبة، وفوكاليز مع الفنانة
نسمة محجوب (ضمن برنامج فابريكا)، وبتدرس حاليًا مع Vocal Xtreem ودول من أقوى الأماكن اللى بتدى كورسات غناء
وتكنيك وSinging
knowledge
مع نادر وشريف الضبع.
نسمة تعاونت
مع مغنيين وفرق كتيرة زى مشاركتها مع فريق كايروكى بأغنية "مكملين" (2013)،
أغنية شوف بقلبك (2016) مع هشام خرما ومجموعة من الفنانين، وسهلة وبسيطة (2018) مع
هشام خرما وهانى عادل، وتعاونت مع حنان ماضى فى أغنية "أخف للحياة" (2017)،
وأغنية مع وائل عامر "الليلة
دى" (2017) وكمان شاركت فى العديد من الإعلانات من 2004/ 2005 لحد دلوقت
أهمها إعلان كوكاكولا "دوق اللحظة".
عملت أغنية
سينجل اسمها "سلم التطور" كلمات بهاء جاهين وألحان على عيسى (2017)،
وبقى لها سنتين ونص بتتعاون مع هشام خرما فى حفلاته، وحاليًا نسمة بتعيش أحلى وأهم
محطة فى حياتها ومسيرتها الغنائية لأنها فى الستوديو شغالة على تسجيل الألبوم
بتاعها اللى هينزل فى 2020 وأول أغنية منه خلال شهرين ومعاها باند قوى جدًا:
إمتى
بدأ حبك للغناء؟ ومين شجعك تنمى موهبتك؟
من وأنا صغيرة جدًا فى المدرسة، تقريبًا فى مرحلة ابتدائى، كنت شخصية هادية
وأكتر حاجتين كنت باحبهم هما الفرنساوى والمزيكا، وفى الحصتين دول كنت باخرج بره
القوقعة بتاعتى، مدام نيرمين هى أكتر حد شجعنى على الغناء وحست أن عندى الموهبة، وخلتنى
الصوليست بتاعة المدرسة، وباغنى الصولوهات دايمًا بتاعة الكورال، هى اللى كبرت ده
جوايا وأنا كنت مبسوطة به، وبقيت باغنى فى كل حفلات المدرسة.
والدتى كمان كان لها دور فى أنها اكتشفت الموهبة دى واهتميت بها وخاصة ان
والدى كان مسافر وإحنا صغيرين، وكان لها تأثير كبير جدًا أنى أحب المزيكا، لأننا
فى البيت كنا بنسمع الراديو أكتر ما كنا بنتفرج على التليفزيون، سواء الصبح قبل ما
ننزل للمدرسة أو حتى وإحنا بنذاكر كنا بنسمع أم كلثوم، وبابا وماما كانوا بيراسلوا
بعض بشرايط مزيكا لعايدة الأيوبى ومحمد منير، من كتر ما سمعت أغانى كنت عاوزة اقلد
المغنيين أو أغنى زيهم وبدأت احفظ الأغانى، ده كان له تأثير كبير جدًا.
أضافت
لك إيه الورش اللى أخدتيها مع الفنان فتحى سلامة ونسمة محجوب والشيخ زين محمود
وأخيرًا Vocal Xtreem؟
أضافت كتير
جدًا، خلتنى فاهمة بالاسم أنا باعمل إيه، واللى أنا عاوزة اعمله كتطوير فى المزيكا
اسمه إيه، وخاصة ورشة الفنان فتحى سلامة عرفتنى على موسيقيين كتير فى المجال
ودلوقت لهم شأن كبير فى الوسط الفنى، أنا كنت معاه فى شعبة "الغناء"
وكنت دايمًا باحب اسمع كلامه عن المزيكا وأننا لازم نتعلم ونطور من نفسنا، كلامه
مليان ثقافة من كل أنواع المزيكا: جاز وشرقى وكلاسيك ويابانى وهندى.. إلخ، هو قامة
كبيرة ومافيش حد زيه فى مصر.
وكمان ورشة
نسمة محجوب كان لها فضل كبير لأنها من أول الناس اللى أدتنى كورسات فوكاليز
وباحترمها جدًا، الشيخ زين فتح عينى على التراث والغناء الشعبى والسيرة والغناء الشرقى
ده جه منين، ويعنى إيه مواويل، الورش دى برضه دى كانت إضافة كبيرة ليا، واتعلمت مش
بس أغنى لكن كمان إزاى أحكى الغناء وأمثله، بطريقة تخلى الشخص شايف القصة أدامه مش
بس سامعها.
أما Vocal Xtreem فدول بارفع
لهم القبعة لأنهم نقلونى نقلة كبيرة جدًا جدًا، عرفت إزاى اغنى باحترافية ويكون
ليا تكنيك، وأشكال التكنيك إيه وبيتعمل إمتى، كمان بدأت ورشة Music theory مع رامى عطا الله فى مكان اسمه The
Music Hub، علشان أقدر اتكلم وأفهم اللغة بتاعة
المزيكا زى ما باقى الموسيقيين بيتكلموا، سواء كان مايسترو أو عازفين أو مغنيين.
فى رأيك إيه الفنون التانية
اللى المغنى مفروض يتعلمها علشان يحسن من أداؤه؟
أنا من الناس اللى مؤمنة أن كل الفنون مفتحة
على بعض، بس الشخص محتاج يبذل المجهود ويحط الإضافة بتاعته لأنها هتخليه مختلف عن
غيره، لما دخلت كلية فنون جميلة فتحت عينى على حاجات وفنون كتيرة، على المسرح والغناء
لأنى اشتركت فى فرقة الورشة، فعرفت إزاى الشخص يكون مؤدى مش بس بيغنى، لازم الفنان
يمتع عينى وودنى، وكل حواسى، لازم يتعلم المسرح والتمثيل، وقفة المسرح، يعرف إزاى
يتكلم، ويتعلم تجويد قرآن علشان مخارج الحروف وينطق الكلام صح وواضح، إزاى يتعلم
يتحرك على المسرح ولغة الجسد علشان يقدر يحرك مشاعر الجمهور.. الفنان على قد ما
يقدر لازم يبقى شامل ومثقف، دايمًا بنسأل نفسنا إزاى الأجانب بيقدروا يمثلوا
ويغنوا ويعملوا حاجات كتير.. ده لأنهم فنانين شاملين.
كلمينا
عن ألبومك الأول اللى بتسجليه دلوقت..
أول سينجل منه
هتنزل خلال الصيف فى شهر أغسطس أو سبتمبر (وده خبر Exclusive لموقع خد كورس)، الألبوم هيكون EP يعنى سى دى صغير (5: 6 تراكات) لكن السى دى الكبير (8: 10 تراكات)،
هيصدر 2019/ 2020 والستايل بتاعه مختلف والفيوجن ده ما اتعملش قبل كده، جامع بين
نوبى وإفريقى وشرقى وجاز وفانك، فاضل فيه لمسات بسيطة.
باتعاون فى الألبوم
مع ناس شاطرة جدًا من الوسط الفنى، صهيب النجار هو المنتج الموسيقى والموزع، أنا قمت
بكتابة الكلمات والتلحين، محمود دسوقى (سوكا) على العود، وصهيب النجار (بيانو) وأندرو
صفوت (بيز) ولوكا (بيركشن) وصامو الطويل (درامز) وياسر حشيش (جيتار)، واللى حط
الأكسنت النوبى فى التراكات وبيلعب دف حمدى متول، التسجيل والميكسنج والماسترنج
اتعمل فى دريم ستوديو (مفدى ثابت) وVocal Xtreem كان لهم فضل كبير فى الإشراف
على تسجيل الأغانى.
الموسيقى بتاعة أغانيكى فيها مزج بين الجاز والنوبى.. هل
المزج بينهم كان صعب؟ إزاى قدرتى تحققيه؟
وأنا باحضر أغانى الألبوم كنت سامعة المزيكا والآلات الموسيقية بس ما كنتش
عارفة إزاى الدمج ممكن يحصل، بوجود صهيب النجار، قدر يحقق المعادلة بتاعة إزاى ندمج
الأكسنت النوبى بطريقة احترافية فى الأغانى، الموضوع غريب وفيوجن جديد ولذيذ
والحمد لله أننا قدرنا نحقق الحتة دى بشهادة ناس متخصصة فى المزيكا لما سمعت أغانى
من الألبوم قبل ما يصدر علشان أخد رأيهم.
أنت لك تجربة فى كتابة وتلحين الأغانى.. إزاى من خلال
العنصرين دول نقدر نخلى جمهور يتواصل مع أغنية وتأثر فيه؟
الصدفة الجميلة أن كل الأغانى اللى كنت باكتبها من 2011 شاء القدر أننا نجمع
الحلو منها ويبقى فى الـ EP بتاعى، أن المغنى هو اللى يشتغل على العناصر
المهمة دى مش حاجة سهلة، والحمد لله ربنا وفقنى فى ده، وإن شاء الله لما ينزل هيحصل
التواصل مع الجمهور، أنا دايمًا باشوف أن كل أغنية هى اللى بتبرز المعنى، كل أغنية
وراها قصة وغالبًا بتكون حصلت للفنان، فبيعيد صياغة الأحاسيس اللى حس بها وبالتالى
بتأثر على الجمهور لأنها لها قصة وتاريخ خلتها تخرج بالشكل ده.
مين رشحك للشغل مع هشام خرما؟ وأضافت لك إيه التجربة دى؟
اللى رشحنى صديقة
الطفولة نسمة الشاذلى وهى مؤسس وكالة Stardust for Public Relations وهى كمان المنتج لكل حفلات وإدارة أعمال
هشام خرما، الموضوع بدأ أنه لما خلص الألبوم بتاعه عمل Audition لناس
موسيقيين كتير، علشان يعرف يحقق المزيكا اللى هو مطلعها بالكمبيوتر تبقى لايف أو
حقيقية، وتم اختيارى، التجربة أضافت لى كتير، الغناء اللى بأؤديه مع هشام صعب
وبيحتاج تمارين كتير لأن بعض الأغانى بتحتاج أنى استخدم صوتى كأنه آلة موسيقية، والبعض
التانى بيحتاج ستايل غناء أوبرالى، علشان كده كنت بارجع لشوية تمارين د. نيفين
علوبة أدتهالى، وأنا مبسوطة بالتجربة دى، وكل ما باطلع على المسرح معاه بأكون فى قمة
سعادتى.
هل
أضاف شغلك فى المورد الثقافى وإيقاع و Youth
Development Companyوغيرها لمجال الغناء؟ إزاى؟
طبعًا أضافوا على المدى الطويل، إيقاع والمورد الثقافى له علاقة أكتر بالمطبخ
الفنى فى فترة معينة وده طبعًا اتعلمت فيه كتير وكونت علاقات كبيرة مع ناس هتنفعنى
الفترة الجاية، أما Youth Development Company حسستنى أن
اللى كل بنعمله للأطفال ده أنا عاوزة أعمله مع الكبار، من ناحية الشغل على
المهارات وتشجيع الأفكار وأن الأولاد تجرب حاجة جديدة ومختلفة، هو ده اللى خلانى
أروح اشتغل فى نفس المجال للكبار.
مين من المغنيين أو الفرق نفسك تغنى معاه/ معاهم؟
أنا باحب
التعاون فى مجال الغناء جدًا جدًا لأنها بتكبر وبتطور الفنان، وأنت بتعملى حاجة
مختلفة مع أسماء تانية، بيبقى عندك رصيد من التعاون وبتقدم طول الوقت حاجة مختلفة
عن اللى قبلها لأن كل حد مش زى التانى، طبعًا كل اللى ما غنيتش معاه أحب أغنى
معاه، وكل اللى غنيت معاهم أحب اشتغل معاهم تانى.
بس ممكن نقول من
مصر والوطن العربى: محمد منير، عزيز مرقة، شارموفرز، OUM، كايروكى، مزيج، وغيرهم كتير من أوربا: Elicia keys, lady Gaga,
Alfredo Rodriguez, Emmet Cohen, Norah Jones, Celine Dion, Mariah Carey, Adele و برضه غيرهم كتير أوى.
إيه
التحديات اللى واجهتك كفنانة عاوزة تبدأ مشوار Solo
فى مصر؟
حاجة أساسية جدًا... وهى وجود المنتج الموسيقى، شخص بيفهم فى المزيكا وبيطلعها
بشكل كويس وكمان بيعرف يوزع، بيكون له رأى مؤثر فى اللى بيحصل وبيطور الفكرة، أنا
قعدت سنتين أدور على منتج موسيقى والحمد لله ربنا كرمنى بصهيب النجار، وجود منتج
موسيقى شىء ضرورى وأساسى فى مرحلة إنتاج المزيكا لحد ما تطلع بشكل مناسب، ده كان
تحدى كبير جدًا! لما فكرت أعمل الألبوم الأسماء الكبيرة فى المجال فيه منهم اللى
مش فاضى واللى غالى أوى فى حين أن الأسماء الناشئة بيكون فيها نسبة مخاطرة.
كمان فكرة أن أهلى يتفهموا أن الموضوع بدأ يبقى غناء بشكل احترافى مش غناء
على نطاق المدرسة والكلية زى زمان، ده أخد منى سنين علشان أحاول أحققه وده أخرنى
شوية فى الانطلاق لأنهم كانوا مش مصدقين أنى فعلاً عاوزة انتقل للمرحلة الاحترافية
ده غير تعارضها مع العادات والتقاليد.
طيب ونصيحتك إيه لأى حد عاوز يبدأ كاريير فى مجال
الغناء؟
نصيحتى أنه يتعلم.. ويقوم حالاً يتعلم، اقرأ عن الكاريير اللى عاوز تدخله، قلد
ناس كتير واتفرج على فيديوهات وأفلام وثائقية على النت، التعليم هو النار اللى بتيجى
بعد الشغف، غذى نفسك بالتعليم، الشغف من غير تعليم مش هيوصلك لحاجة، لكن الاتنين
سوا هيفرقوا أوى مع شخصيتك وعلشان تشبع اللى جواك، وليه اتعلم بفلوس كتير؟ فيه حاجات
كتير متاحة أونلاين وكتب كتير، وفيه كمان التعلم بالمشاهدة وبالممارسة، لحد ما يبقى
لنا شخصيتنا وهويتنا المستقلة فنبقى مختلفين عن غيرنا.
