قصة رحاب بتثبت لأى حد موهوب وعنده شغف
وحب لمجال معين واشتغل على نفسه ممكن ببساطة يوصل لأبعد مدى، حتى لو دراستك مش نفس
المجال اللى أنت بتحبه ممكن تطور نفسك وتتعلم وتحقق حلمك بالإمكانيات المتاحة ودعم
اللى حواليك.
رحاب عبد الناصر حصلت على بكالوريوس
إعلام من جامعة القاهرة قسم صحافة (القسم الإنجليزى) عام 2010 واشتغلت مدرس مساعد
فى الكلية من 2011 لحد 2015، من وهى صغيرة بتحب التفصيل ومجال الفاشون وبالتالى
شغلها فى الكلية كمدرس مساعد منعها من التفرغ للمجال ده، ولكن فى الفترة دى شغفها
بالفاشون والتصميم فضل مستمر، واشتغلت كمان كمحررة فاشون فى مواقع ومجلات كتيرة لحد
فى سنة 2013 أسست Mahberry Designs علشان تطلع
تصميماتها للنور وتظهر إمكانياتها وشطارتها كمصممة أزياء.
ولأن الموهبة مش بس كفاية ومحتاجة دراسة
علشان تثقلها أخدت دبلومة فى الفاشون من Career Gates لمدة سنة (2015: 2016) وشاركت قبلها فى مسابقات كتيرة وفازت مرتين فى
المسابقة العالمية للفاشون Maison Academia سنة 2012 و2014، كمان افتتحت مشروع تانى لها Hapi Handmades فى فبراير 2017 وهو حاليًا أونلاين ستور
موجود على أنستجرام وفيسبوك.
إمتى بدأ شغفك بالفاشون والتصميم؟
الحقيقة أنا مش فاكرة وقت محدد بدأ فيه
حبى للأزياء.. يمكن من أول ما بدأت ألعب بالعرايس وأنا باحب أعمل لهم فساتين
وإكسسوارات بنفسى، ولما كبرت شوية فى مرحلة ابتدائى كانت لعبتى المفضلة أنى أجيب إيشاربات
قديمة واعمل منها فساتين ليا ولأصحابى ونعمل فاشون شو فى البيت... لكن فهمى لفكرة
تصميم الأزياء بشكل حقيقى كان فى نهايات إعدادى، بدأت أجيب كتب عن الموضوع وأفكر
وارسم تصميمات وكمان بدأت اتعلم التطريز اليدوى بخامات مختلفة.
خلال ثانوى والجامعة كنت باحاول أتعلم
أكتر عن المجال من خلال متابعة مصممين الأزياء والقراءة عن الموضوع أكتر، بعدها
بدأت أكتب عن الفاشون فى مجلات أونلاين واشتغلت فترة كمحررة أزياء فى مجلة معروفة،
لكن كل ده ما كانش كفاية وكان لازم أدرس الموضوع بشكل احترافى أكتر علشان كده
اتجهت أنى أخد كورس مكثف لمدة سنة واحصل على شهادة فى مجال تصميم وتنفيذ الأزياء.
أضاف لك إيه كورس الفاشون؟
أكتر حاجة استفادتها من الكورس أنه زود ثقتى فى نفسى وقدرتى أنى
أكون مصممة أزياء، لما لقيت نفسى عارفة أتابع وأنفذ كل المطلوب بشكل ناجح ولقيت
ردود أفعال كويسة جدًا من الأساتذة اللى درسوا لى، ده طبعًا بالإضافة لمجموعة
مهارات أساسية أدتنى مساحة أكبر لفهم عملية تصميم وتنفيذ الأزياء على الرغم من أنى
كنت عارفة معلومات كتير عن المجال بالفعل لكن التنفيذ العملى تحت إشراف محترفين
أكيد بيفرق فى قدرة الواحد على إنتاج شغل أفضل وعلى تحديد نقط الضعف والقوة عنده علشان
يحدد اتجاهه بعد كده.
لكن فيه حاجة مهمة لازم تتقال وهى أن عمر كورس أو حتى الدراسة
الأكاديمية ما هتعلمك كل حاجة، هى بس بتدى قاعدة أو نقطة بداية للشخص، لكن مجهوده
وطريقة تفكيره بعد كده هما اللى بيحددوا مدى تطوره ونجاحه فى أى مجال.
إيه معنى كلمة Mahberry؟
وإيه الـ concept اللى بيقوم عليه التصميمات؟
Mahberry أو "ماه
برى" هو اسم فارسى معناه "من تملك جمال القمر ونقاء الملاك"، وهو
اسم لأميرة فى أسطورة فارسية قديمة قريتها وأنا عندى حوالى 12 سنة، جمال القصة
وشخصية الأميرة اللى بتجمع بين الجمال والقوة أثروا فيا جدًا ولما فكرت أعمل براند
كان ده أول اسم جه فى بالى.
وبالنسبة للـ Concept الأساسى فى تصميماتى فهو تقديم اللمسة التراثية الشرقية بشكل عصرى
ومناسب أنه يتلبس فى حياتنا اليومية لأن تراثنا غنى جدًا بمصادر الوحى وممكن يُستغل
بشكل رائع، حاجة كمان باهتم بها أن القطع اللى بانفذها يكون فيها ولو جزء مصنوع
يدويًا علشان الشغل اليدوى بيدى القطعة جزء من روح الفنان اللى اشتغلها وبيبقى لها
قيمة خاصة، ده غير أنه بيديها عنصر التميز لأن مافيش قطعة يدوية بتتكرر مرتين
ويطلعوا بنفس الشكل بالضبط.
إيه الصعوبات اللى واجهتك لما بدأتى المشروع؟
من أكبر المشاكل اللى واجهتنى واللى
يمكن لسه بتواجهنى إلى حد ما هى التسويق والوصول للمستهلكين، وأظن أن دى مشكلة
كبيرة عند معظم مصممين الأزياء الشباب لأن السوق المصرى فعلاً مليان بالماركات
والمحلات اللى بتستورد من بره مصر وده خلى مافيش مكان كبير للمنتج المصرى، ناس
كتير بتفتكر أن الإنترنت وخاصة الفيسبوك هما الحل للمشكلة وبيسهلوا الوصول للناس
لكن برضه الموضوع مش بالسهولة دى لأن كمية المحتوى المتاح للمستخدمين على الإنترنت
كبير جدًا وبيغطى عليه برضه الناس اللى بتستورد أو تبيع بأسعار قليلة، وبالتالى
مطلوب منك أنك تتعب جدًا فى إنتاج محتوى يجذب الانتباه وتعرف الوقت المناسب لتسويق
المحتوى ده على شبكات التواصل وأنك تبذل مجهود يمكن أكتر من مجهود التصميم
والإنتاج فى أنك توصل للأشخاص اللى ممكن يهتموا بشغلك.
إيه المختلف فى مشروع Hapi Handmades عن Mahberry؟
Mahberry براند بتقدم
أزياء وإكسسوارات فيها لمسة تراثية، أما Hapi أو "حابى" فهو
جاليرى لعرض وتسويق المنتجات اليدوية المصرية واللى بتشمل تصميمات Mahberry بالإضافة لشغل مجموعة من الفنانين المصريين منهم أفراد أسرتى لأن
كل حد فيهم متخصص فى نوع من الفنون والأعمال اليدوية، وأشخاص تانيين تعرفت عليهم
من خلال شغلهم التراثى الرائع.
فكرة المشروع جات لما واجهت صعوبة كبيرة
فى أنى ألاقى مكان أعرض فيه تصميماتى لأن معظم الأماكن مش بتهتم بعرض شغل لناس لسه
بتبدأ أو بتطلب نسبة كبيرة من الأرباح،
وخلال السنين اللى فاتت تعرفت على مجموعة ناس موهوبين فعلاً بيواجهوا نفس المشكلة
فلما لقيت قدامى فرصة توفير مكان زى ده يجمع شغل الناس اللى عندهم موهبة وفن حقيقى
كان لازم أستغل الفرصة دى وأنفذ المشروع، والحقيقة أنه من غير مساعدة والدى وزوجى
ومشاركتهم ليا فى المشروع ما أظنش أنه كان هيتنفذ.
فى رأيك محتاجين إيه علشان مجال تصميم الأزياء والإكسسوار ياخد
مكانة فى مصر وبره؟
هو فيه 3 حاجات أساسية محتاجينها علشان نبرز المواهب اللى موجودة
عندنا بالفعل وندى المجال ده فرصة أنه ياخد مساحته اللى يستحقها:
أولاً:
توفير أماكن لتعليم التصميم بشكل صحيح واحترافى وبأسعار مقبولة علشان معظم الناس
بتضطر تعلم نفسها وبياخدوا وقت طويل جدًا علشان يعرفوا يبتدوا شغل أو يقدموا حاجة
قابلة للبيع، وكتير من الناس مش بتلاقى فرصة تفهم المجال وأصوله بالشكل المطلوب
لتقديم منتج ينافس فى السوق العالمى.
ثانيًا:
الاهتمام بالحرف التراثية الموجودة فى أنحاء مصر واللى كتير منها قرب ينتهى بسبب
الإهمال مع أننا لو اهتمينا بها هنلاقى كنوز بمعنى الكلمة من التنوع والإبداع
والوحى لتصميمات مافيش زيها فى العالم، فن التطريز البدوى السيناوى وفى واحة سيوة
والتطريز بالتللى وقماش النول دى مجرد أمثلة بسيطة لمدى التنوع والكنز الحقيقى
اللى مدفون فى أعماق مصر.
ثالثًا:
وأخيرًا التسويق.. لأننا لو عاوزين مجال الأزياء ياخد حقه ومكانته لازم تتوفر
أماكن أكتر لعرض أعمال المصممين وفنانين الحرف اليدوية وتكون الأماكن دى مجهزة
بشكل أنيق وفى أماكن متميزة، ده غير أنه لازم تكون فيه قنوات لتسويق منتجات
الأزياء المصرية سواء أونلاين أو على أرض الواقع داخل وخارج مصر ويبقى متاح
للمنتجين أنهم يحصلوا على مساعدة من متخصصين فى تسويق منتجاتهم والوصول للمستهلكين
علشان يركزوا فى عملية التصميم والتنفيذ وبالتالى يطلعوا إنتاج أفضل يقدر بالفعل ينافس.
طبعًا الحاجات دى مش سهل تتوفر والموضوع هياخد وقت كبير، بس
الفكرة هى أننا ما نعتمدش بس على المؤسسات الحكومية مثلاً ونستناها تساعد.. لو كل
واحد فينا قدم اللى يقدر عليه فى أى عنصر من التلاتة دول أكيد هيبقى فيه فرق
والمجال فعلاً هينمو بشكل كبير ومش بعيد خلال كام سنة تلاقى مصممين مصريين كتير
بينافسوا فى الأسواق العالمية وبيوصلوا لنجاح حقيقى.
