جيلان مدحت: ... هنا أخدت قرار أنى أسيب الشغل وأشتغل على مشروعى

مصر فيها موارد كتيرة وغنية لكن للأسف غير مستغلة، شبابها كمان يعتبروا من الموارد دى، كتير منهم حقق نجاح كبير واشتغل على نفسه وعلى فكرته ويستحق أنها تشوف النور، خاصة لو الفكرة دى بتساهم أنها تطور مهارات أسر كاملة وتطور من موارد البلد ومنتجاتها، ومن المشروعات اللى تستحق الاحترام والتقدير وأن يتسلط عليها الضوء مشروع "Rubia Handcrafts" واللى شاركت فى تأسيسه جيلان مدحت.

جيلان اتخرجت من كلية فنون تطبيقية سنة 2011، عندها دلوقت 30 سنة واشتغلت فترة كبيرة مصممة جرافيك لشركات كبيرة وصممت دعايا لمطاعم مشهورة فى القاهرة ودبى، حبها للتصميم هو كان العامل الأكبر اللى شدها لفكرة مشروعها، شاركت بمشروع Rubia فى الدورة الأولى لحاضنة أعمال كلية سياسة واقتصاد بجامعة القاهرة FEPS لما كان مجرد فكرة وكانت واحدة من 5 مشروعات اتقبلوا فى مرحلة الاحتضان وده ساعدها أنها تطور من نفسها ومن مشروعها وتحوله لبيزنس ناجح، ودلوقت تطور بشكل كبير لمرحلة أنها بدأت التسويق لبيعه خارج مصر.

روبيا للحرف اليدوية هى شركة ناشئة هدفها تطوير الحرف اليدوية لعمل منتجات يدوية بتصميمات معاصرة على أيد حرفيين محليين مهرة، وطبيعة الحرف اللى روبيا بتشتغل عليها هى الحرف اللى بيطلع منها منتجات أثاث داخلى والهدف من المشروع هو إحياء الحرف التقليدية والمحلية، وكمان بتستخدم وتطور الموارد المحلية علشان تزود الإنتاج وتنشط السوق المحلى للتنافس مع الأسواق الدولية، بدأت التصميمات بمنتجات الكليم فى الوقت الحالى وبعدها بقى تصميمات لقطع أثاث كاملة.

طيب إزاى بدأت الفكرة؟ وإيه سبب تسمية المشروع؟ وإيه اللى بيميزه؟ تعالوا نعرف قصة جيلان مدحت مؤسسة شركة Rubia Handcrafts بالتفصيل:

يعنى إيه Rubia؟

هو ترجمة لاسم نبات "الفوة" باللغة الإنجليزية، نبات كان بيستخدم زمان من أيام الفراعنة وفى إفريقيا وكل العالم، بيستخرجوا من جذوره الصبغة الحمراء (درجة من درجات الأحمر)، وسبب التسمية هى "الجذور"، زى ما أنا رجعت لجذورى لما سافرت محافظات كتيرة فى بداية مشروعى، وكمان جذور النبات ده، وفوة هو اسم مركز فى كفر الشيخ، والمركز متسمى على اسم النبات ده لأن مركز فوة واحد من أكتر الأماكن اللى فى مصر بتهتم بصناعة الكليم والسجاد اليدوى.   

إمتى بدأت فكرة المشروع؟ احكى لنا عن كواليس التحضير وكل فرد مسئول عن إيه؟

بدأت فى 2016 لما كنت بافكر أنى نفسى أعمل حاجة بعيد عن مجال الوظيفة، فى نفس الوقت ده كنت عاوزة اكتشف مصر بثقافاتها المختلفة، سواء كانت جوه القاهرة أو خارجها من باقى المحافظات، بدأت السفر بالمحافظات السياحية زى سيناء وطابا ونويبع ودهب وسيوة ومرسى علم، وكان الهدف مش فقط للسياحة لكن أنى أعرف ثقافة كل محافظة بناسها ومواردها كل منطقة كانت مميزة وفيها كمية موارد أبهرتنى وللأسف غير مستغلة، وبدون أى هدف أو تخطيط بدأت بعدها أزور أماكن فى القاهرة معظمنا ما بيروحهاش، بعدها الموضوع كبر وبدأت أزور محافظات أكتر فى الدلتا والبحر الأحمر من غير أى تخطيط منى لمجرد أنى عاوزة أرضى فضولى فى اكتشاف ثقافة كل منطقة، ونظرًا لطبيعة دراستى كانت أكتر الموارد اللى بتشدنى اللى لها علاقة بالفنون والشغل اليدوى فى المحافظات.

فى 2017 خلال زيارتى لسيوة سياحيًا اتعرفت على أهالى سيوة، ولقيتهم بيشتغلوا منتجات يدوية هايلة ومختلفة منها الكليم، ولما رجعت القاهرة والفكرة فى دماغى أنى عاوزة أخد الكليم من سيوة وأبيعه فى القاهرة، بعدها بكام شهر اتكلمت مع حد من زمايلى وعرضت عليه الفكرة، وبدأت أعمل حصر لسوق الكليم هنا فى القاهرة، هل له سوق ولا لأ، وعملت سيرش على تاريخ الكليم، واكتشفت أنه بيتعمل فى كل محافظات مصر، وكل محافظة ومنطقة لها رموز وألوان بتختلف معانيها عن التانية، وعرفت أماكن تمركز صناعة الكليم فى كل منطقة.

ونزلت للمناطق دى أدور على ورش لحد لما استقريت على ورش كويسة وهنا بدأت فكرة الموضوع تتطور معايا، وبدأت أفكر فى إزاى أطور من التصميمات وأخرج بره التصميمات التقليدية، وسألت الحرفيين يقدروا ينفذوها لى ولا لأ، ومن خلال معرفتى ومتابعتى لمدارس الفنون المختلفة فكرت أنى أطور الحرفة نفسها.

هنا أخدت قرار أنى أسيب الشغل وأشتغل على مشروعى وأنى أعمل فريق، كلمت مريم ياسر هى صاحبتى ونفس دفعتى وبدأنا شغل، فى نفس الوقت ده قدمنا فى حاضنة أعمال كلية سياسة واقتصاد FEPS، الحمد لله كسبنا وخلال فترة 4 شهور احتضان اتنقلنا نقلة كبيرة من مجرد اتنين شغالين فى وظيفة ولسه بيبدأوا أنهم إزاى يحولوا الفكرة والتصميم لحاجة ينزلوا بها على أرض الواقع ويحولوها لبيزنس، وبقيت أنا مسئولة عن التصميم والإنتاج، ومريم مسئولة عن التسويق والمبيعات.

إيه اللى استفادتيه من مشاركتك فى حاضنة أعمال كلية سياسة واقتصاد؟

من الآخر كده عملت لى إعادة برمجة لدماغى، لما دخلت كان أول مرة فى حياتى ابدأ بيزنس، أه باحب التصميم وطايرة به فى عالم الأحلام، لكن بدأت FEPS تفهمنا أن الموضوع مش قاصر بس على التصميم لازم أعرف احتياج السوق، أخدت حاجات لها علاقة بالماركتنج ودراسة السوق والتسويق والحسابات، اتجاه السوق دلوقت فين فى مصر والعالم، غير أنها عملت لى Networking مع ناس فى مجالى وبمجالات تانية كتير حلوة جدًا، كل واحد منهم كان له تأثير عليا، وكان فيه Mentors أقوياء جدًا من ناحية Product Design أو فى طبيعة الحرف اليدوية وحتى فى القانون، وعرفت إزاى أسجل مشروعى قانونيًا، والشركة مسجلة حاليًا باسم "روبيا للحرف اليدوية" أو Rubia Handcrafts وحاليًا أنا بادرس إزاى أصدر منتجاتى بره، وفيه بالفعل Samples سافرت لأسبانيا ولأمريكا.   

إيه الصعوبة أو التحدى اللى بتواجهيه علشان تطلعى منتج بالجودة دى؟

هو الموضوع كله الصراحة مليان تحدى وصعوبات، لكن من أكبر التحديات أنى أبقى فاهمة طبيعة الحرفة نفسها وألاقى ورش وحرفيين كويسين، لأن الورش اللى فاتحة كتير لكن مش كل الحرفيين الشغالين فيها كويسين، لازم يبقوا شاطرين وكمان يطلعوا التصميمات بتاعتى المختلفة عن التقليدية، تانى تحدى متعلق بطبيعة المنتج وهو أنى ألاقى الألوان اللى بتعبر عن التصميمات بتاعتى فلجأت أنى أصبغ ألوان الصوف بنفسى وقدرنا نوصل لمصابغ صوف قدرت تضبط درجة الألوان المطلوبة. 

كمان واحدة من التحديات واللى لسه بندرسها ولسه شغالين عليها ونتيجتها مش هتظهر دلوقت، أن إزاى كل حرفة نطور منها ونطلع منها منتجات مختلفة غير المعتادة.

إيه اللى بيميز منتجات Rubia كتصميم وإنتاج عن أى شغل هاندميد تانى؟

أن Rubia مش بس بتشتغل على الحرفة زى ما هى، لكن بتشتغل على تطوير الحرفة نفسها بحيث نطلع منتج يقدر ينافس المنتجات اللى بنستوردها من ناحية التصميم والجودة والإنتاج.

هل التصميمات لها Theme محددة ولا كل منتج مستوحى من فكرة مختلفة؟

كل كولكشن لها تيمة بتميزها، زى أول كوليكشن طلعته كان شكل الموتيفة متاخد من شكل الريش وشكل العصافير، وبعد ما باشتغل على تصميم الموتيفة باشتغل على شكل أو تصميم السجادة كاملة على بعضها.

شغال معاكم كام حرفى دلوقت؟ وهل هما عندهم خبرة ولا بتقدموا لهم تدريب قبل الشغل؟

لحد دلوقت معانا 6 حرفيين، وكلهم عندهم خبرة عالية، ودى كانت واحدة من التحديات اللى قابلتنا فى الأول، للأسف لسه ما بدأناش فى مرحلة التدريب، بس دى واحدة من أحلامى اللى نفسى أحققها.

فى رأيك إيه اللى ممكن نعمله علشان ننشر شغل الهاندميد المحلى وينافس بقوة الجاهز المستورد؟

الحقيقة أن واحدة من طموحاتى وأحلامى الكبيرة جدًا أنى أنشر فكرة أن بلادنا فيها موارد كبيرة، وأنى ألهم ناس كتيرة تبدأ تدور على الموارد دى وتطور منها وتشتغل عليها كويس أوى، ومن خلال التسويق ومن خلال المعارض سواء محليًا أو عالميًا نقدر نخلى المنتجات دى تنافس فعلاً.

إيه نصيحتك لأى حد عاوز يبدأ مشروعه ويعمل منتجات هاندميد؟

نصيحتى أنه لازم يبقى محدد من الأول إيه الشغل اللى عاوز يبدأ فيه، لازم يبدأ خطوة خطوة ويطور منها، أى حد داخل فى مشروع هاندميد لازم يعرف طبيعة الحرفة ولازم يتعلمها، لازم يدرس إيه الجديد اللى هيقدمه فى الحرفة دى أو هل هيقدمها زى ما هى.. أهم شىء الدراسة وكيفية التطوير.

إيه هو حلمك أو هدفك الكبير؟ (سواء شخصى أو Rubia)

هو مجموعة من الأحلام مش حلم واحد، واحد من أكبر أحلامى أنى أقدر أصدر منتجاتى وده شغالة عليه دلوقت، وتانى حلم أن يبقى عندى الورشة بتاعتى اللى أقدر من خلالها أعلم ناس كتير معدومى أو محدودى الدخل من كل المحافظات علشان أوفر لهم شغل، أدربهم ويبقوا العمالة بتاعتى ومن خلالها ينتجوا ويبقى لهم مصدر دخل ثابت، حلمى كمان أن نفسى المشروع ده يشجع ويلهم ناس كتير حواليا تعمل ده وتعمل مشاريع وتدرب وتشغل ناس، وكمان حلم شخصى أن يبقى عندى جاليرى بتاعى شخصى فيه منتجات أنا باعملها بأيدى.